يعني ايه kernel

يعني ايه كيرنل "kernel" بقا؟

الكيرنل هو برنامج بيتبرمج ويتحفظ في مكان على مساحة البروسيسور -كنت شرحت بروسيسور يعني ايه قبل كده تقدر تكتب CPU في السيرش وهتلاقيه- لكن مكان مخفي بحيث ان المستخدم العادي ميقدرش يوصله والبرنامج بيشتغل تلقائي على حسب الاوامر اللي بتوصله اللي هنعرفها بعد شوية...

وكمان الكيرنل ليه مساحة لوحده غير المساحة اللي انت بتستخدمها عشان لا انت تعوقه عن انه يقوم بمهمته ولا العكس..

طب ايه هي اهمية الكيرنل؟

هو القلب النابض للموبايلات و مهم جدا زي اهمية البروسيسور طبعا ومن غيره متقدرش الاوامر تروح وتيجي بين المعالج و بينك

و ظيفة الكيرنل بقا؟

اهم جزء..
ليه 3 وظائف هحاول ابسطها على قد ما اقدر..

1-ادارة الذاكرة "Manage Storage"

هو بيكون بمثابة العقل المدبر كده

بمعنى ادق واوضح..

هو بيستقبل منك الاوامر و يترجمها ويبعتها للبروسيسور -زي وظيفة عقلك في جسمك- فيبعتله البروسيسور انه عايز حاجة معينة من الذاكرة فيجيبه للبروسيسور عشان يترجم ويتعالج ويظهرلك...

ولازم نبقى عارفين انه بيتعمل مع ذاكرة الوصول العشوائي قبل الذاكرة الداخلية واحيانا ذاكرة الوصول العشوائي يتبقى مليانة فبيضطر يتعامل مع الذاكرة الداخلية ولما يطلب البروسيسور المعلومات اللي بعتها الكيرنل للذاكرة الداخلية لتحليها ويقدمها ليك فيقوم الكيرنل رايح للذاكرة الداخلية يجيب منها المعلومات و يبعتها للبروسيسور..

بعد كل ده معناه انه بيتحكم في الذاكرة زي ما هو عايز و بمنطق برمجي معين ومحدد..

2-إدارة المدخلات والمخرجات

الكيرنل بيقون بدور الوسيط بين المدخلات والمخرجات..

بمعنى ابسط..

انت لما تشغل برنامج الميوزك بلاي بتختار الاغنية وتدوس play في الحال بتبدا السماعة الخارجية بتطلع صوت الاغنية..

تعالوا نشوف ده بيتم ازاي..

لما انت دوست على Play يبقى الشاشة هنا اللي قامت بدور المدخلات (وفي الحالة دي بوجه خاص بتعمل بدور المخرجات برضو عشان هيتم عرض عليها حاجة) وساعتها بياخد الكيرنل الامؤ ويوديه للمخرجات اللي هي السماعة الخارجية فتبدا في انها تطلع صوت الاغنية

وده المقصود بادارة المدخلات والمخرجات..

3-ادارة ال Software و ال Hardware

الاول نعرف الفرق بين السوفتوير والهاردوير..

السوفتوير:-هي البرامج اللي بتتعامل معاها زي برنامج الفيس والواتس واي حاجة

الهاردوير:-هي الاجهزة والحاجات الملموسة زي الكاميرا والشاشة

نرجع لموضوعنا..

هو هنا برضوا بيقوم بدور الوسيط بس هنا بين البرمجيات والاجهزة بحيث انه بياخد الاوامر من البرمجيات ويقوم بدوره في اصدار الاوامر فب قيادة الاجهزة..

ولو خدنا المثال بتاع الاغاني تاني فهنلاحظ انه خد امره اللي بعته المستخدم من خلال الشاشة (جهاز) ووصل امر لزرار Play في برنامج ميوزك بلاي (برمجيات) وبعدها البرنامج وصل اشارة للكيرنل عشان يشغل السماعات (جهاز)..

وده ينطبق على اي اوامر بتعملها انت من خلال شاشتك..

ملحوظة:-البروسيسور "proccesor" ترجمته عربي معالج فهتلاقيني قلت كلمة يعالج ويترجم كتير..

من Ahmed K. Kotb