المخترع العظيم ، توماس ألفا أديسون ..
اتولد اديسون سنة 1847 في مدينة ميلانو في ولاية أوهايو الأمريكية ..
في التعليم .. اديسون مقضاش في التعليم الحكومي غير 3 شهور بس !!!!
في اول سنة ابتدائية ناظر المدرسة شاف انه طفل بليد ومتخلف عقلياً ..
أول اختراع لأديسون كان وهو عنده 21 سنة .. لما اخترع جهاز كهربي لتسجيل الأصوات في الأنتخابات .. بس مفيش حد اشتري الجهاز ده '
فشل الجهاز الأول اداله الدفعة انه يخترع اجهزة ممكن يبعها ويستفيد منها علي نطاق اوسع .. نطاق عالمي !
بعد كدة اخترع جهاز لصرف تذاكر القطارات .. وباع الأختراع ده بـ40 ألف دولار .. وده مبلغ ضخم في الوقت ده !
وبعد كدة توالت بقي الأختراعات بتاعت توماس ... الي خلته راجل مشهور وغني برضو .
ساعتها .. اهم اختراع لأديسون كان "الفونوغراف" .. الي اتسجل باسمه سنة 1877 .. وأعظم اختراعاته كلها كان المصباح الكهربي سنة 1879 .
مكنش اديسون اول واحد يخترع المصباح الكهربي .. فيه كتير سبقوه في الاختراع ده , حتي ان المصابيح الكهربية كانت بتستخدم لأضائة شوارع باريس .
لكن مصباح ايديسون , مع نظام توزيع الكهرباء الي اخترعه .. خلا المصابيح الكهربية صالحة للأستعمال في كل البيوت .. وبعد كدة قامت شركة ايدسون سنة 1882 بإنتاج الكهرباء لمدينة نيويورك كلها !!
وبعد كدة انتشرت الكهرباء في أمريكا كلها .. وبعدين في العالم كله !!
وبعد دخول الكهرباء كل البيوت .. حط اديسون الأساس الحقيقي لتطور الصناعة في العالم ..
كما ان اديسون ساهم في تطور كاميرات السينما , وساهم في اختراع التليفون خصوصا انه هو الي اخترع الكاربون الي بينقل الصوت .. وساهم في اختراع اجهزة التلغراف والآله الكاتبة .. واختراع البطاريات الجافة (Dry cells) والميكرفونات .
سجل اديسون بأسمه اكتر من 1000 اختراع , وده عدد العقل ميصدقوش اصلاً !!
وواحد من اسباب عظمة اديسون في اكتشاف السيل ده من الأختراعات , انه عمل لنفسه معمل وهو صغير .. وعين بعض المساعدين معاه .. وكان المعمل ده نموذج للمعامل الي عملتها المصانع الكبري بعد كدة .. ولا شك ان عمل النوع ده من المعامل المنظمة والي بيشتغل فيها عدد كبير من العمال بروح الفريق .. من اعظم اختراعات اديسون .. ومن علامات العصر !
واديسون مكنش مخترع وبس .. كان شريك في عدد كبير من الشركات الصناعية زي جنرال اليكتريك (موجودة لحد دلوقتي) .
اديسون كان بيعاني طول حياته من ضعف في السمع .. الضعف ده كان بيضعف من قدرته الهائلة علي العمل وعلي التركيز .. وبقي منعزل علي العالم الخارجي .
اتجوز اديسون مرتين .. زوجته الأولي ماتت وهي صغيرة . وكان له 3 اولاد من كل زوجة ...
توفي اديسون في نيوجيرسي سنة 1931 بسبب مضاعفات مرض السكر .. مات في بيته الي اشتراه لزوجته التانية عشان الجواز .. واتدفن في الحديقة الخلفية للبيت .
