بوست عن الفوتوشوب
الاول انا مش ديزاينر ، لسة موصلتش مرحلة الاحتراف بس هشارككوا بعض من الحاجات اللي اتعلمتها علي مدار الحوالي كام شهر دول
يلا بسم الله البوست طويل شوية بس المهتم هيقرا
الاول اتكلم عن التصميم عامةً مش الفوتوشوب بس
تصميم الفيديوهات ليه برامج كتير اشهرها الفاينل كت والادوبي افتر افكتس والسوني فيجاس ودول اختصاصهم الخدع البصرية زي اعلان بيبسي وزي حاجات تانية كتير وتقدر من الرابط ده تشوف فيديوهات فيها خدع بصرية معمولة بالبرامج دي
يجيي واحد يقولي اللينك ده متفيرس ،، ماشي انا مصدقك انت ممكن تخش يوتيوب وتكتب "finalcutking" هتظهرلك القناة اول حاجة وهتلاقي عليها علامة صح
تمام انت كدا شوفت امثلة عن الخدع البصرية لو انت بقى عاوز تتخصص في المجال ده بتاع الخدع البصري وكدا يبقى اهم البرامج اللي تستخدمها هي final cut و adobe after effects s و sony vegas pro و camtasia studio اخر برنامج ده بتستخدمه عشان تصغر حجم الفيديو مش اكتر ...في برامج تاني كتير بس دول اشهرهم
وانت ممكن تتخصص في برنامج واحد بس مش لازم كله يعني
انا ارشحلك تتخصص في الافتر افكتس لانه رائع وسهل
والقنوات دي هتساعدك عشان تبدأ مشوار التعليم ع البرامج دي
لو احترفت المجال ده انت ممكن تشتغل في هوليود مبهزرش هناك بيحتاجو الحاجات دي في الافلام بتاعتهم ربنا يكرمنا ويكرمكم
--------------------------------------------------------------
كدا خلصنا من تصميم الفيديوهات والخدع البصرية
دلوقتي لو انت حابب تصميم الصور في كذا برامج للمجال ده بس اشهرهم الفوتوشوب
الفوتوشوب ليه كذا نوع احسنهم اللي هو اخر اصدار Photoshop CS6 ودور علي لينك تحميله من جوجل لحسن حد يطلع يقول اني بحطلكو لينكات ملغمة
وفي نوع تاني من الفوتوشوب "photoshop CC" بس لو انت مبتدء انا ارشحلك البرنامج الاول اللي هو CS6 عشان الـ CC عليه ادوات زيادة وعشان برضو اغلب الشروحات علي اليوتيوب بيستخدموه
في برامج تانية غير الفوتوشوب بتستخدم في التصميم الصور زي الاليستريتور
بس الاليستريتور لو انت بتحب الرسم وكدا عشان ده برنامج رسم انما الفوتوشوب بتاع تصاميم ، الاليستريتور ليه مميزات والفوتوشوب ليه مميزات وتقدر تشوف في جوجل مقارنة بين الاليستريتور والفوتوشوب
طب دلوقتي نتكلم عن الفوتوشوب
لو انت لسة متعرفش اي حاجة عن الفوتوشوب يبقى الاول تتعلم الادوات
انا اتعلمتها ازاي ؟؟ انا اول ما حملت الفوتوشوب مكنتش اعرف اي استخدام لاي اداة حبيت اتعلم مع نفسي عملت بروجكت جديد " ctrl + new" وقعدت اجرب مع نفسي الادوات والي معرفتش استخدمها ادورلها علي اي شرح في يوتيوب
وواحدة بواحدة هتتعلم الادوات وتحترفها
،،ملحوظة: عمل الكوميكس متعتبرش حاجة لانك كدا بتكتب علي الصور بس ودي تعملها بالرسام اساسا عشان بيصادفني مواقف كتير ان حد يسالني بتفهم في الفوتوشوب اقوله اه يقولي وريني كوميك انت عامله ساعتها ببقا عاوز اعمله بلوك
التصميم = ابداع
طيب دلوقتي انت اتعلمت استخدام الادوات وزي الفل
التصميم في الفوتوشوب ليه اقسام كتير اوي اشهرها الريتاتش و .... هقول الباقي تحت
يعني ايه ريتاتش: الريتاتش ده تحسين الصور
يعني تجيب البت سوكة اللي في فيلم ابو علي وتخليه احلي من انجلينا جولي
وبيستخدم برضو في صور الفمايصة يبقى الواد شبه الميكانيكي الي لسة طالع من تحت العربية وفجاة يبقى توم كروز متسالش ازاي
بس اشهر استخدام للريتاتش بيكون في الاعلانات والبوسترات وصور الموديلز والممثلين
وده فيديو بيوضحلك صورة لموديل قبل وبعد الريتاتش واتعمل فيها ايه
طيب دلوقتي انت عاوز تتعلم الريتاتش تعمل ايه
بص الفيديوهات دي هتساعدك بس دي انجليزي معرفش هتناسبك ولا لا
لكن انت ممكن تكتم الصوت خالص وتقلد الفيديو وخلاص وان شاء الله هتلقط اي حاجة *الفيديوهات دي مش انا اللي عاملها*
-----------------------------------------------------------------------
-----------------------------------------------------------------------
-----------------------------------------------------------------------
-----------------------------------------------------------------------
-----------------------------------------------------------------------
-----------------------------------------------------------------------
-----------------------------------------------------------------------
والقناه دي بقي ممكن تأسسك وتفهمك يعني ايه ريتاتش
وده لينك شرح انا اللي عامله عن الريتاتش الصور الطبيعية اللي هي بحر ورمال والحاجات دي
ابقى اشترك في القناة عشان معوركش
________________________________________________
التصميم مش بس ريتاتش بس الريتاتش دي حاجة مهمة عشان هتساعدك في انواع كتير يعني مثلا لو اتطلب منك تعمل بوستر فيلم ، بعد ما تخلص البوستر هتحتاج الريتاتش عشان تخلي شكل البوستر بروفشينال وتخليه اجمل
طب كدا خلصنا من الريتاتش واتعلمناه
في اقسام تانية للفوتوشوب برضو ليها شهرة حلوة زي مثلا الويب ديزاين
ده تصميم المواقع وده عليه شغل حلو اوي ممكن تتعلمه وتطلع علي "مستقل" وتشتغل هناك كـ فري لانسر وهتكسب حلو
"مستقل" ده اسم موقع دور عنه في جوجل
الويب ديزاين انا مش هعرف افيدك فيه اوي عشان انا متخصصتش فيه بس اتفضل الفيديوهات دي ان شاء الله تساعدك
وده كورس ويب ديزاين: https://www.youtube.com/playlist…
طيب كدا خلصنا من الويب ديزاين
في قسم خاص بالدمج
ايه الدمج ده ؟؟
ده تركيب الصور بس باحترافية شوية
شوفت اعلان اتصالات بتاع الكلب اللي عض الواد وراح طلع الموبايل خد سيلفي ؟؟
شوفت برضو اعلان اتصالات بتاع البت اللي عملت حادثة وخدت سيلفي ؟؟
اهو الصورتين دول معمولين دمج ،،
اصلا الكلب معضش الواد ولا جه جنبه ، الكلب كان في صورة والواد في صورة والناس اللي ورا كانوا في صورة لوحدهم اساسا
الدمج ده بقا انك تاخد الكلب وتخليه يعض الواد وتاخد السيكيوريتي الي كانوا في صور تانية تخليهم في الصورة وتظبطها عشان اللي يشوفها يفتكرها حقيقي + بعض الريتاتش عشان تخلي الصورة حلوة كدا وكيوت
واللينك ده بيوريك اعلان اتصالات اتعمل ازاي
ولو عاوز تتعلم الدمج البلاي ليست دي هتساعدك
فيديوهات انجليزي
في اقسام كتييييييييييير اوي وتنفعك بس اللي يدور
وعشان احنا كـ عرب بنكسل ندور وعاوزين كل حاجة لحد عندنا ، ف انا جبتلك اللينك ده هيساعدك اقرا منه الاقسام والقسم اللي يناسبك دور عنه في جوجل
بالنسبة للاليستيتور انا مش هقدر اساعدك فيه اوي عشان انا متخصصتش فيه ولا حتي قريت عنه بس اللي قريته ان هو بيستخدم للرسم وبيتعامل مع الفيكتورز مش الصور
بالنسبة بعد ما تتعلم التصميم عامة باي اختصاص لو حابب تشتغل هتشتغل ايه ؟
بص التصميم اصلا ابداع + احترافية استخدام
يعني اهم حاجة في التصميم الفكرة وتكون بتعرف تستخدم برامج التصميم
والالهام والافكار دي بتجي مع الوقت
طيب انت دلوقتي بقيت بروفيشينال ومبدع وكدا هتشتغل ايه
بص في الحالة دي الشغل هو اللي هيجيلك مش انت اللي هتروحله
هيجيلك وفي تاكس كمان هيهيهيهي
ولحد ما الشغل هو اللي يجيلك انت ممكن تشتغل فري لانسر بيكسب حلو بدل شحاتة الريفيرالز اللي انتشرت الفترة دي
اشتغل في مستقل حلوة بتكسب
واحد يقولي ازاي الشغل هو اللي يجيلي انت هتهزر
لا والله ما بهزر بص
واحد اسمه احمد عماد الدين ناس كتير عرفاه بس لو انت متعرفهوش ده ديزاينر عادي في كلية صيدلة بس شغله نضيف وافكاره مش عادية مبدع لفوق الحدود
في يوم فتح الايميل بتاعه لقى في رسالة جاتله من فرقة بينك فلويد
فرقة بينك فلويد دي فرقة كانت بتغني من الستينات
وهما اللي طلبوا منه يعملهم ديزاين الالبوم بعد ما شافوا شغله وعجبهم
هما اللي طلبوا منه وبعتوله رسالة ع البريد بتاعه
وقريب اتكرم من ضمن افضل 25 مصمم علي مستوي العالم
هو ببساطة كان عنده حلم ومشي وراه وتعب
ربنا يكرمه ويكرمنا ويكرمكم
تقدر تعرف عنه اكتر من البوست ده
https://www.facebook.com/photo.php?fbid=854025054651800&set=a.308409302546714.75139.100001329398061&type=1
كدا اظن ان انا خلصت لو حد عنده استفسار يقول
البوست هيتعدل تاني ان شاء الله لو في حاجة انا كنت ناسيها وافتكترها هعدل البوست واكتبها او لو في غلطة انا هعدل البوست واصلحها
حابب بس اوضح حاجة ملهاش دعوة بالتصميم بس حابب اقولها
علي فكرة اسمها "ان شاء الله" مش "انشاء الله"
ليه ؟ عشان "ان شاء"يعني اذا اراد الله .... انما "انشاء" يعني بناء
ولو فتحت القران علي سورة الكهف الاية 23 و 24 هتلاقي
*بسم الله الرحمن الرحيم*
"ولا تقولن لشيء اني فاعل ذلك غدا الا ان يشاء الله" الي اخر الاية
"الا ان يشاء الله" هتلاقي "يشاء جت لوحدها و ان لوحدها دي كلمة ودي كلمة منفصلين
