تعريف فئة الموبايلات المتوسطة وازاي تشتري الي هيريحك

البوست ده بداية لسلسلة جديدة ..
ان شاء الله هنتكلم فيها كل يوم عن موبايل من الفئة المتوسطة او بمعنى اصح الاقتصادية عشان نفهم الموبايلات دي فعلا تستحق الاقتناء ولا لأ .. في البداية بس احب عرفكم البروسيسور او سلسلة البروسيسورز المستخدمة بنسبة ٩٠٪ من موبايلات الفئة المتوسطة وهم سلسلة Qualcomm Snapdragon 600

و على الاخص Snadpdragon 615

البروسيسور ده استخدمته شركات كتيرة جدا في تصنيع موبايلاتها صاحبة الفئة المتوسطة عشان هو نسبياً كويس وعملي نوعاً ما .. طب ايه امكانياته ؟

-البروسيسور ثماني النواة *Octa Core * بس هو مش Real Octa .. يعني مش ثماني النواة كلياً .. هو بيعمل باربع انوية بتردد ١.٥ جيجاهيرتز و اربعة تانيين ١ جيجا هيرتز *مثلاً * هو بيدعم لحد رباعي النواة ١.٧ جيجاهيرتز و على حسب كل شركة واختيارها لمواصفات الموبايل

وخلينا نقول ان التردد ده هيعمل بشكل كويس جدا لو على تلاتة جيجا رام او أعلى .. وهيفتقر للدقة و التعامل مع الجرافيكس و الHigh performance لو ٢ جيجا رام أو أقل

- البروسيسور بيدعم حتى ٢١ ميجا بيكسل كاميرا .. ودي حاجة كويسة جدا .. كمان بيصور ڤيديوهات بجودة ١٠٨٠ بيكسل على 30fps ودي جودة كويسة اوي لتصوير الڤيديوهات .. الوحش بس في الموضوع انه مبيدعمش دقة التصوير 4k .. ودي ممكن نتغاضى عنها زي ما الناس تغاضت عنها في عملاق هواوي اللي هو P9 و P9+ .. طب تغاضينا عنها ليه ؟ عشان جودة التصوير الرهيبة في P9 .. عشان كدا لازم الشركات تهتم بتصنيع الكاميرات في الموبايلات اكتر من كدا عشان الناس تتغاضى عن الاخطاء اللي فيها

- البروسيسور بيدعم خاصية الشحن السريع ودي حاجة مهمة في تنافس الفترة الاخيرة وده كويس جداً عشان الناس اللي بتشتغل او عندها دروس أو أو..

- البروسيسور ده يقدر يشغل موبايل بجودة شاشة ١٦٠٠×٢٥٦٠

يعني جودة رائعة جدا للجيمنج والمسلسلات و الافلام وغيره!

- كمان بيدعم الجيل الرابع و LTE و سرعته مناسبة جداً للداونلود بس فيه افضل من كدا

- بيدعم كمان الUSB 2.0 و بلوتوث 4.0

- بالنسبة للرامات فهي كويسة جدا من نوع LPDDR3 بتردد 800mhz وده جداً كويس لل٣ جيجا رام مثلا بالنسبة للجيمنج

يعني البروسيسور ده ممكن يعمل جهاز قوي جداً لو الشركات اهتمت بيه ، وهيبقى قوي وسعره اقتصادي كمان .. بس مفيش حد بيفكر في كدا للأسف

البداية في الموبايلات هتكون عن هواوي Gr5

كترت عنه الأسئلة والمقارنات و الناس اللي شايلاه كمان عددهم بيزيد ، هل هو فعلا كويس ؟ طب هل هو وحش وده مش باين ؟ هنشوف دلوقتي ..

في بداية المواصفات هنتكلم عن شاشة الموبايل .. الشاشة بجودة HD" ١٠٨٠ × ١٩٢٠ بيكسل " على شاشة ٥.٥ انش بمعدل الوان ٤٠١ لون في البيكسل .. والشاشة واخدة ٧٢٪ من حجم الموبايل .. الشاشة دي جميلة جداً للمشاهدة واللعب و حجمها يعتبر كبير نسبياً بس فيه ناس بتحب الحجم ده من الموبايلات ولكل واحد ذوق .. وطبعا هينضم تحت فئة الفابلت اللي هو مش موبايل ومش تابلت ..

# الموبايل بيحتوي على كاميرا خلفية واحدة بجودة ١٣ ميجا بيكسل بتصور بجودة ١٠٨٠ بيكسل وفتحتها ٢.٠ مم و كاميرا امامية ٥ ميجا بيكسل بتصور بجودة ٧٢٠ بيكسل و فتحتها ٢.٤ م و الكاميرتين بيصوروا بجودة رائعة في الاضاءة الكويسة اما عن الاضاءة الضعيفة يعتبر كويس الى حد ما بس كان فيه الافضل من كدا

# متوفر من الموبايل نسخ متعددة معظمها ٢ جيجا رام على مساحة تخزين ١٦ جيجا بايت متاح منهم ١١ جيجا بايت و نسخة ٣ جيجا رام على ١٦ جيجا بايت و الاتنين بيدعموا مايكرو اس دي كارد لغاية ٢٥٦ جيجا بايت على السواء

# البروسيسور هنا الشقيق المعدل ل سناب دراجون ٦١٥ .. واسمه سناب دراجون ٦١٦ وبينهم فروق ضئيلة جدا ..

البروسيسور شغال بتردد ١.٥ جيجا رباعي النواة هيرتز و ١.٢ جيجا هيرتز رباعي النواة

وده على النسخة ال٣ جيجا رام يشغل الالعاب القوية كويس جدا

# مش محتاج اقول ان اهم مميزاته مستشعر البصمة ودي حاجة كويسة جدا في الموبايل لو في الفئة المتوسطة والمستشعر شغال بشكل كويس

# بطارية الموبايل غير قابلة للازالة بحجم ٣٠٠٠ ملم امبير وهي قوية وتستحمل الى حد كويس جداً ..

# بيدعم LTE كمان للناس المهتمة بالنت والشبكات وسرعته ممتازة

# شغال بنظام اندرويد لوليبوب ٥.٠ يدعم الترقية الى مارشميلو ٦.٠.١ و كمان للناس المهتمة هو نزله البيتا بتاع اندرويد نوجا " 7.0.1 Beta "

والموبايل فعلا يستحق الاقتناء بس النسخة ال٣ جيجارام هتكون افضل طبعا .. وسعره كويس جداً كمان بالاضافة انه من احسن الاختيارات الموجودة للفئة المتوسطة " بس مش احسن واحد وفيه افضل منه "

المنافس اللي قصاد الموبايل ده على طول جالاكسي J7 2016 وده اكيد هنتكلم عنه الفترة الجاية