من السايت العظيم theglocal.com بينصحك بافضل 10 ابليكشنز للاندرويد مفيدة ليك جداً
١- Shush
أوقات كتير بـ نعمل موبايلاتنا سايلنت سواء علشان مــيـتـنـج، أو نايميين أو لأى سبب تانى. لكن أغلب الوقت بـ ننسى نرجعه تانى. البرنامج ده هـ يساعدك تحل المشكلة. كل ما تعمل موبايلك سايلنت هـ يطلع لك البرنامج ده يسألك عايزه سايلنت لمدة قد إيه؟ ويرجع الصوت بعدها علشان يتأكد إنك مش هـ تنسى.
٢- RunPee
برنامج لمحبى مشاهدة الأفلام الأجنبية فى السينما!
البرنامج بـ يقولك إيه أحسن وقت خلال الفيلم ممكن تقوم تروح الحمام من غير ما يفوتك حاجة مهمة. وبـ يقولك كمان إذا كان فيه مشاهد بعد ما التترات بـ تنزل فى نهاية الفيلم، وتستاهل تستنى وتشوفها ولا لأ. وكمان بـ يكتبلك بيحصل إيه فى أول 3 دقايق فى الفيلم علشان لو دخلت السينما متأخر.
٣- Shazam
برنامج مشهور جدا. بتسمعه أى مقطع من أى أغنية، ويقوم هو يدور جوا المكتبة بتاعته ويعرفك اسم الأغنية ومين بيغنيها، وشوية معلومات عنها. مفيد جدا لما تسمع أغنية أو موسيقى فى مكان ما أو فى إعلان أو فيلم، وتبقى عايز تعرف دى إيه.
٤- Splitwise
برنامج مفيد للى عايشين مع ناس تانية فى بيت واحد أو اللى بـ يخرجوا مع صحابهم كتير، وياكلوا برا سوا وكده. البرنامج ده بتدخل فيه الفاتورة وتكتب مين اللى دفع، وتضيف أسامى أصحابك، وهو بيجمع كل ده ويقولك فى النهاية مين عليه فلوس لمين، ويخلص الحسابات دى أوتوماتيك. مفيد جدا كمان لو مسافر مع أصحابك.
٥- Muzei
من برامجى المفضلة بشكل شخصى. اللى بـ يعمله هو إنه يوميا بـ يغير خلفية الموبايل بتاعك للوحة من اللوحات الفنية العالمية. كل يوم خلفية موبايلك هـ تتحول للوحة فان جوخ أو مونيه أو أى فنان تانى. ولو دست على أى مساحة فارغة فى موبايلك مرتين هـ يخلى الصورة أوضح. والبرنامج بيديلك تنبيه يعرفك معلومات أكتر عن الصورة واللى راسمها.
٦- Aptoide
برنامج ممكن تعتبره السوق السودا للأندرويد. باختصار البرنامج ده تقدر من خلاله تدور على أى برنامج أندرويد من المدفوعين، وأغلب الوقت هـ تلاقيه وتنزله ببلاش. ومش بس كده، هو كمان مفيد علشان تنزل البرامج الموجودة فى سوق جوجل أمريكا، ومش متاحة فى مصر أو الشرق الأوسط. برنامج مهم جدا ورئيسى.
٧- Companion Safety App
البرنامج مفيد بالذات للبنات أو الأشخاص اللى ساكنين فى حتة متطرفة أو مقطوعة. فكرته ببساطة إنك عن طريق البرنامج بتختار المكان اللى انت رايحه، وبتختار شخص أو 2 أو 3 من أصدقائك اللى معاك نمر تليفوناتهم (مش لازم يبقى عندهم البرنامج) يتابعوك. فالبرنامج بـ يبعتلهم لينك يفتحوه يقدروا من خلاله يتابعوا مكانك على الخريطة لحد ما توصل المكان اللى انت رايحله.
خلال رحلتك دى لو الموبايل وقع منك، أو سماعة التليفون اتشدت، أو بدأت تجرى، أو ما وصلتش فى خلال المدة المتوقعة، البرنامج بـ يطلعلك رسالة يسألك لو انت كويس ولا لأ. لو ما دوستش على الدايرة الخضرا فى خلال 15 ثانية، بيبعت رسالة فورية لصحابك اللى اخترتهم يعرفهم إنك ممكن تكون فى خطر، ويعرفهم مكانك بالظبط علشان يتحركوا.
٨- Pushbullet
لو عندك أندرويد ده لازم يبقى أول برنامج على موبايلك! البرنامج ده بـ يسمحلك تشير لينكات، صور أو حتى نوتس ما بين موبايلاتك المختلفة، ولابتوباتك وأى أجهزة عندك. كام مرة حد بعتلك لينك على الواتساب مثلا وكنت عايز تفتحه على اللابتوب؟
كام مرة كنت بتقرا مقالة على اللابتوب وعايز تكملها على التابلت؟ ودى مش كل مميزات البرنامج الحقيقة، لكن هـ سيبك تستكشف الباقى!
٩- Pocket
طول الوقت بـ نقابل مقالات أو فيديوهات أو حتى ستيتس على الفيس بوك عايزين نحتفظ بيه أو نقراه بعدين. هى دى بالظبط وظيفة بوكيت! ومش بس كده، البرنامج دلوقتى كمان بـ يسمحلك تعمل فولو لأصحابك وتشوف المقالات اللى بـ يحتفظوا بيها علشان لو عجبتك. وبعد فترة كمان بـ يبدأ يستوعب نوعية المقالات اللى بتحبها وبيحاول يقترح عليك مقالات جديدة تضيفها لليسته بتاعتك. ده غير إنه بـ يسمحلك تنزل المقالات دى وتقراها أوفلاين! يعنى مش محتاج إنترنت علشان تقرا المقالات.
١٠- FxGuru: Movie FX Director
برنامج مش بالضرورة مفيد، لكنه مسلى جدا! البرنامج بـ يسمح لك تستخدم مؤثرات ويطلع لك فى النهاية فيديو قصير كأنك مصوره فى هوليوود، عن المكان اللى صورته وهو بـ ينفجر، أو مثلا بتنزل عليه كرات من اللهب أو بتحتله الأشباح.
اتفرج على الفيديو اللى فوق وشوف البرنامج ممكن يعمل إيه.
